Remh Daihnak Lamtluang

Remh Daihnak Lamtluang

March thla ah tlangcung party pawl, Candidates pawl he zeihmanh ceihtinak um loin phunghrampi remh an i zuam. Pyidaungsu Hluttaw meeting cu ni tampi an tuah i “a tlam a tling lomi” timi kha “a tlamtling lomi,” ah siseh, “tar thazaang a ngei lomi” timi kha “kum khua upa cangmi”timi lawng an remh kho. Cu an remh khomi fehternak tuah dingah mipi duhnak lak than ding a si nain phaisa tam tuk dih ding a si caah an ngol than i zeihmanh thathnemnak a chuahpi lomi riantuan bantuk record ah a lut ai. Mipi phaisa millions taampi an dih. Tlang chimh kho dirhmun tiang an dih nain phunghrampi an remhnak kho lo caah NLD party nih hin phunghrampi remh kho ding dirhmun ngei dawh a si ti lo caah lung cu a tha lo.

Hi thil chia lakah a thatnak pakhat kan char ahcun party ngan pawl nih Federal kong an duh tak le duh tak lo an lungput cu tlangcungmi nih fiang tein kan hmuh khawh hna. NLD nih an remh duhmi kan zoh ahcun Pyidaungsu Hluttaw ah ralkap MP pawl zorter le State Counselor DASSK President si khawhnak kha a biapi inn remh an duhmi a si. Tlangcungmi tluk ruannak le mah te in khuakhan lairel khawhnak upadi remh an duh lo timi fiang tein hmuh khawh a si.

USDP le ralkap pawl nih remh an duhmi article pawl cu Democracy caah Hluttaw kip ah ralkap pawl zorter lo ding,  ramkulh le ramthen ah vuancichoh cu mah ramkulh or ramthan hluttaw nih zalawn tein thim khawhnak pohma 261 remh ding an duhnak biasu an chuahpimi hmuh a si. Nain miphun tluk ruannak le mah te in khuakhan lairel khawhnak pawl cu an duh ve fawn lo, Federal phung an duh lo.

Tlangcung mi party pawl lawnglawng nih miphun tluk ruannak, mah tein khuakhan lairel khawhnak le Federal Union ser khawh dingah remh an duh ti cu fiang tein hmuh khawh a si. Pahnihnak ah a tutan zong kum 2 leng an ngol cangmi Union Peace Conference-21st Century Panglong  cu a phi tha chuah kho ding dirhmun si lem loin thok an timh than.

 

Leave a Reply

Your email address will not be published. Required fields are marked *