Ramhrin Mitlawm Phun Kongkau Ah NLD Le USDP Lungput An I Khahnak

Ramhrin Mitlawm Phun Kongkau Ah NLD Le USDP Lungput An I Khahnak

Ramtang upadi aa tlaihmi lungput President Thein Sein chan in aa thawk i NLD cozah chan tiang aa pehmi kum 10 chungah, ramhrin mitlawm phun hna kan cung le Bengali Muslim hna cungah Kawl ralkap phu nih an tuahsermi thahnawnnak le ning-cang lo tuahtaunak he pehtlai in Aung San Suh Kyi le NLD cozah nih, hi thil a tuahtu ralkap phu cungah voikhat te hmanh mawhchiatnak bia an chim bal lo kha ruah lengmang tikah, Kawl cozah paohpaoh lungput cu hriamnam thazaang bochan in nambeh khawh an si chung paoh cu, kan duh paoh in kan tuah ko hna lai,” timi ramtang upadi (jungle law) aa tlaihmi lungput asi kha a langhter.

Kawl cozah paoh cu hi bantuk lungput angeimi an si ruangah 1947 Pinlung Biakam le Biahren kha nihin ni tiang `uan chuah tim loin, a pah tu in an pahbuar chin. “Kum 60 renglo chung ramchung raldohnak le miphun lungrual lonak aruang hrampi cu, Kawlmi kanmah nih Pinlung Biakam le Biahren kha kan pahbuar peng ruangah asi,” tiah Kawl cozah nih an chimrel hi theih a um bal lo.

Nihin kan ram ah a min a laar bikmi Kawl party cu NLD Party le USDP Party an si. Hi party pahnih cu Kawl miphun pumpi kha a aiawhtu dingah sermi Kawl party an si. USDP party cu ralkap cozah sermi party asi. Hiti asi caah Ralkap phu le USDP cu pakhat an si. Ralkap phu le USDP party nih an i tlaihmi ramkhel policy cu 2008 phunghram upadi chungah fiang tein hmuh khawh asi. Cu upadi ahcun, ramkomh Kawlram nih aa ngeihmi ramkhelnak nawl, uknak nawl le biaceihnak nawl he pehtlai in a sang bik nawlngeihnak kha Ralkap phu kut chungah chiahpiak asi. USDP le Ralkap phu nih an i tinhmi ramkhel kawltung cu, ramhrin mitlawm phun hna nih kum 72 chung kan sunghmi covo (mahte uknak le khuakhan lairelnak nawl) kha a zungzal phihkhar le ramkomh Kawlram kha “Kawlmi lawng nih, Kawlmi caah, Kawlmi duhnak in uknak” phung kha fehter zungzal ding, timi kawltung hi asi. Hiti asi khawh nak hnga, 2008 upadi cu thlen khawh asi lo nakding caah pyidaungsu hlutdaw ah ralkap `hutdan 25% in humventer asi cu mi zapi hmuh asi ko.

USDP party chungtel kip nih an `ih bikmi thil cu, ramhrin mitlawm phun hna duhmi Federal democracy uknak phung hi asi. Zeicahtiah Federal uknak phung cu, 2008 upadi ningin ralkap phu kut chung i a ummi aa-naa vialte le sipuazi aa-naa vialte kha a phitkharmi uknak phung asi. Ralkap phu nih Federal phung an `ih tuk ruangah, ram chung ral a daih khawh nakhnga, Federal uknak ser awkah voi 4 tiang tuah cangmi 21 Century Conference, Pinlung ah, mitlawm phu hna duhmi Federal principle cu Ralkap phu nih khen kham an i zuam kha hmuh asi.

NLD Party nih aa hmaithlakmi rian cu 2008 upadi nih a dirhthohmi ralkap aa-nasin uknak phung kha hrawk i mi zapi duhnak uknak phung (democracy) ser rian kha aa hmai thlakmi ramkhel party asi. Ramkomh Kawlram bantukin miphun tampi khuasaknak ram ah cun, democracy (Zauk phung) cu, mi tam bik Kawlmi kha aa-naasin bantukin uknak nawl a ngeihtermi uknak phung ( dictatorship of the majority) asi. Hi asi caah mitlawm phu asimi Chin, Kachin, Shan, Kayah, Karen, Mon le Rakhine miphun kan caah cun, democracy uknak phung cu tih a nung ngaingaimi uknak asi zia hi kan tanpal ciami ramkhel tuanbia ah fiang tein hmuh asi cang. U Nu chan parliamentary democracy siseh, 2008 upadi nih a dirhthohmi ralkap tlaihhipmi democracy siseh, hi uknak phung cu ramhrin mitlawm phu dihlak kha Kawlmi kuttang sal ah a cantermi uknak phung an si.

Ralkap aa-naasin uknak phung le cu uknak a dirhthohmi 2008 upadi hrawk rian kha i hmaithlak ding in bia a rak i kammi NLD party cu, ramhrin mitlawm phu Chin, Kachin, Shan, Kayah, Karen, Mon hna nih kan i bochan caah, 2015 thimnak ah NLD party cu mefung kan rak pek dih. NLD party nih mincimh tei in teinak a hmuh i fawi tein cozah a ser khawh. Sihmanhsehlaw, a luan ciami kum 5 chung ramhrin mitlawm phu kan cung i NLD cozah riantuan ning cu, ramhrin mitlawm phu nih kan i ruahchanmi he aa lingtaletmi tuannak lawngte an si kha kan hmuh.

Aluanciami kum 5 chungah NLD cozah nih ramhrin mitlawm phun kan cungah ramtang upadi (jungle law) ningin ramkhel rian a tuan ningcang le mitlawm phu kan cungah aa ngeihmi lungput hi a tanglei ah hin kan zoh rih tuah lai.

By Cung Nawl

Leave a Reply

Your email address will not be published. Required fields are marked *