Ni 4 Chung A Tlau Mi Pu Ceu Hlei Thang Ngandam Tein An Hmuh Than Cang

Ni 4 Chung A Tlau Mi Pu Ceu Hlei Thang Ngandam Tein An Hmuh Than Cang

Thantlang Peng Thlualam ram ah thing-ah putnak in 2020 October 24 ah a tlau mi Pu Ceu Hlei Thang (kum 33 a si) cu October 28 ah ngandamte le himbawm tein an hmuh thang cang, tiah October 29 ah kan theih.

A tlau ning hi amah nih a chimnak ahcun muithla (mithla) a si ko lai a ti. Zaan an riahnak ah hin thawngpang a theih lengmang. A hawipa kha i thial usih, a ti nain a duh lo. A thaizing ahcun a tlau diam. Ni 4 hnu ah Tlangrua khualei ah a va chuak i atu bantuk in an hmuh hi a si.

Hi a tlau chung vialte hi Salen khuami, a bik in Vambai khuami nih an chawva le caan pek in an kawl. An cung ah lunglawmhnak tampi kan ngei ko. Pathian nih thluachuah pe chin ko hna seh ti hi kan thlacamnak a si,” tiah chungkhar lei in upa pakhat nih The Hakha Times ah a chim.

Pu Ceu Hlei Thang hi ramtang ah ni 4 chung a um tik ah kedan aa danh lo i a ke cu a tlek ngaingai nain a ngandam ko, tiah kan theih. Atu bantuk mitlau hi Thantlang khuami zong ni zeimawzat a tlau hnu ah hmuh a rak si bal ve, tiah kan theih. Crd: Hakha Times Daily Newspaper.

Leave a Reply

Your email address will not be published. Required fields are marked *