Hakha Quarantine Feeling

Hakha Quarantine Feeling

By: Sui Len Tial: Yangon in kan phak zan ah positive a simi kong cu upa nih chim rihlo ding an kan ti caah ka tial rihlo bia a si i atu zan cu zapi theih in Hakha Post ah an hun thanh cang caah amah positive nu te kongah siloin tuanvo ngeitu lei hoih in chiatnak, thatnak ka hmuhning ka tial cang lai. Q ummi dihlak cu thongtla pawl bang mah le inn cio in rawl chanh si kaw rawl chantu unau pawl le Q lutmi cu kan mui hmanh kan i hmu kho lo.

Mino pawl nih i chang in tuanvo an kan lak piak i rawl kha tuanvo latu mino nih an rak kan pek. An kan chanh ciami thil zeihmanh pek than a ngah lo. Kan herhmi cawk piak ding zongah tangka pek a ngah lo, tuanvo ngeitu nih an kan liam piak chung. Mah kong ahhin cun cunglei upa pawl nih ralrinnak an ngeih zia le mino pawl riantuaning ka thangthat ngai hna.

Asinain…thatnak chim hnu ah asinain ti bia nih a hun zulh ahcun chiatnak lei a hun panh cang lai tinak. Kan phak ni thla ni 8 zan suimilam 8:30 hrawngah positive a si ti thawng kan theih i siizung lei a kal hnu, 9:30 hrawngah ngandamnak lei upa pahnih an ra i bia an kan chimh.

An kan chimhmi cu a tha ngai ko, nain a zul kho lo zong cu kan um ve thiam thiam hoi. Asinain zulh phung zulh le zulh lo kong kha tial kaa timmi a si lo caah mah kha cu um ko seh. Kan umnak inn i Positive a si ti an hngalh ko bu ah rungrul thahnak sii tal an kan kah piak lomi hi cu tuanvo ngeitu an daithlang ka ti lai maw asiloah thawngzamh an hngah ta bia dik.

Thawngzamh i an thanh cang hnu cun thaizing hrawng cun an rak kah khawh men asiloah kah thailo zong a fawi. Mah zawn ahhin cun ngandamnak lei tuanvo ngeitu an daithlang pah tiah ka hmuh. Kan umnak sawng hi dot hnih a si i a cung dot ah zunput le ti kholhnak a um lo. Inn tang ah zunput khan thum, le ti kholhnak khan khat a um.

Atu Q in a ummi dihlak hi minung 18 (kumkhat le cheu ngakchia nu telh in) kan si i cuka zunput le ti kholhnak ahcun mah Q i a ummi dihlak kal a si caah kan lung cu a tha hrim lo nain kan duh zong duhlo zongah thim khawhmi kan ngeih lo caah rungrul thahnak sii tal cu tuanvo ngeitu nih kan kah piak kho hna sehlaw kan lung hna a ngam deuh hnga i kan i lawm tuk ko hnga.

Leave a Reply

Your email address will not be published. Required fields are marked *