Hakha Quarantine Feeling Part IV

Hakha Quarantine Feeling Part IV

By; Sui Len Tial: FQ um cu lung tthawn lo ahcun thinlung zawtnak (hnalung/seihciah yawka) ngeih a fawi te. Zeicahtiah social distancimg au pi lengmang lio caan ah FQ hmun ah mi bu piin chiah a si tikah kanmah le mah kan i ttih cio hna i thinlung re a thei tuk.

FQ an kan chiahmi hi a tha bakmi a si. Asinain umnak hmunhma le sining nih a tlinh ve lo tikah tuanvo ngeitu caah a fawi lo bantukin FQ pawl ca zongah a fawi ve hlei lo.

Umnak hmunhma nih a tlinh lo ahcun zarhkhat chung a tlungmi kha a kenkip ah chiah loin hmunkhat in chiah sisehlaw anmah an hun i lim in khan mithar i chia than sehlaw a tha deuh tiin ka hmuh. Asinain atu cu hmunkip ah chiah i mithar le mihlun cawhlulh in um ter a si tikah a him lo ngai.

Atu cu kanmah umnak hi 7 an chuak cang i 11 kan tang. Atu a tangmi hi ni 14 um dingmi chungah nikua leng a um cangmi kan si hna. Nai ahkhan a chuakmi an um pah caah mithar an rak chiah te men hna lai tiah mi pakhat sinin thawng kan theih tikah kan lau tuk cio. A ruang cu hi ka a ummi hi a damlo mi an tam caah a si. Damlo ahcun thitha zong a der caah ttih a nung ti kha kan ruah caah a si.

Ngandamnak lei tuanvo ngeitu pakhat kha thinphang in phone kan hei chonh i a kan lehnak cu, mihlun kan um caah mithar rak chia hna hlah uh ti phun kha cu a si kho lo. Nanmah tu kha tha tein i ralring ko uh.Umnak hmunhma aa zat lo caah a si a kan ti.

Kanmah lei nih kan duhnak cu zarhkhat leng a um cangmi kan si caah mithar an luh ahcun zawtnak an rak i phorh lai kha kan phang ve. Cucaah mihlun le mithar hi cu a dang tein kan chia kho hna sehlaw kan caah a him deuh ti kan ruah caah a si.

Cuti a si khawhlo ahcun atu a tangmi hi Swab tests voihnih an kan tuah cang i negative kan si ko caah umnak hmun zong nih a zat ttung lo a si ahcun home quarantine zong in kan chia deuh hna sehlaw mithar tu kha kan umnak hmun ahhin chia hna sehlaw a tha deuh lo ma ti hna khi kan ruat ve.

Zeicahtiah zunput le tikholhnak pakhat kan i hrawm dih tikah mithar le mihlun kan i cawh ahcun kan caah a him lo ngai.

FQ ummi sining le phannak te hi tuanvo ngeitu lei zong nih kan ruah piak thiam ulaw mihlun le mithar chiah ttinak kong te hi cu kan ruah piak than law a tha ngai hnga tiah.

Leave a Reply

Your email address will not be published. Required fields are marked *