FQ Ummi Sining Le Mi Cheukhat Hmuhning

FQ Ummi Sining Le Mi Cheukhat Hmuhning

By; Sui Len Tial: Cheukhat hmuhnak ah FQ a ummi pawl hi khual tlawn a ngah lo ti theih ko buin nawl an ngaihlo caah a si tiah nan ruah khawh men. Nan hmuhning kha a palh lo nain a hman ve hlei lo. Zeicahtiah kan hmuhning le ruahning paoh hi a hman ti khawh a si lo, mah le sining a si lomi theihthiam cu a har ngaimi a si. Cucu minung phung a si ko. Khual tlawn hi a ngahlo an ti nain tlunkal lo awk a tha lomi cu tlunkal khawh a si. Cucaah mah le sang cio ah thohkhansa lakin kan tlun kal khawh vemi a si. Khual a tlawngmi nan mawh ti ahcun thohkhansa petu khin aa thok lai I, lam a kan on piak tu pawl khin aa changchang in cunglei upa tiang khin mawh phurh an hau dih hnga.

Hmun dangdang I FQ a lutmi pawl hi zeibantuk dah an si ka hngal hna lo nain a tam deuh cu inn-dwin-hmuh I a ummi kanmah bantuk an si cio lai tiah ka ruah, nawl ngailo zong cu an um hrimhrim lai lo ti khawh a si ve lo (anmah le an I hmuhning cio ahcun a herh ruangah an tlun a si ko lai cuh). Asinain atu I keimah ka umnak inn-dwin-hmuh I a ummi dihlak hi cu tlunkal lo awk a tha lomi lawng te kan si. An sining ka hal hna hnu ah ka tialmi a si.

Cheukhat cu sianginn a kaimi kan si. Covid second-wave hlan ah tang 9, 10 sianginn an hun on khan University zong a rauh hlan ah an on theu lai tiah final Thesis tialmi tlamtlin lo ding phan ah a kal I Second wave ruangah a tang I Yangon um rih dingah inn hlan man, ei din man sining nih a tlinh lo ruangah a rak tlungmi kan um hna.

Kawl nu pakhat cu siizung riantuan asi I Sagaing in Chin State ah an thialmi asi I aho theih hngalh a ngeimi zong asi lo, rawl chantu hmanh a ngei lo. Chin State kal dingin cunglei upa nih nawl aka peknak thlakhat asi cang caah zeiti awk hngalh loin ka ra, ati. FQ ka chuah hnu khoika ka um lai zong ka hngal lo a ti. Zeitluk zaangfak dah a si! Ruat hmanh, mah tluk zawtnak lakah mah bantuk upa zong cu an um ve hoi.

Cun cheukhat cu damlo ruangah Yangon siizung a panh I operation aa tuahmi minung pathum le a um pitu pawl an I tel. Atu hi operation tuahnak kan hma a fak pah an ti nain siibawi pawl FQ hmun rat a ngah lo caah, nan celhlo cun (celhlo hnu ah mu) OPD ah nan kal te lai ti asi. Zeitluk zaangfak dah an si! Ngandamlo cu duhthim phun asi lo. Hakha ummi an si hna I Yangon I an I piahnak ah lockdown ruangah an tan bia asi I tlun lo awk thalo khi an si hna.

Cun hika a ummi kan pi lebang cu cancer in a zawmi asi I Yangon ah aa thlop vemi asi. Damlo ruangah a si thiamthiam. Damlo chap, lungretheih in FQ um hi kan duhmi cu a si hrim lo. FQ cu laiholh cun khumh-erh an ti I a min hrim khi ruat ulaw zeitluk in dah thinlung re a theih (khumh-erh cu kawl holh in kan chim cun seih-cin-ciat-tae ti bak khi a si ko). Stay home ah kan seih-a-cin-ciat pah nain mah nak dotkhat a hun kai deuh I FQ ti ahcun kan seih-a-cin-ciat tukah hin thawchuah hmanh kan I harh phah. Cucaah cheukhat cu lungdaihnak sii an ding phah.

Cun kum khat le cheu ngakchia cu a damlo ruangah Mandalay siizung a phanmi an si. A nu le a pi he pathum an si. Mah vialte sining kha kan chim ve lo tikah a lenglei mi nih cun nan theihthiam ve lai lo caah phun dang in nan kan ruah khawh men.

Damlo ahcun kan thinlung tha hrim khi a der cia, mah lak ahcun kan umnak hmun I Positive an hmuh chap tikah zeitluk in dah kan lungre a theih i kan van a san ti kha a um ve lomi nihcun nan theithiam lai lo. Zan hngilh khawh lo tiang in a ummi an um pah. Mah chinchap ah rungrul thahnak sii te hmanh kah piak kan tong lo (kan chimh ko hna nain thla ni 8 zanah an hmuh sikaw nihin thla 12 tiangah sii an kan kah piak lo). Tuanvo ngeitu cu chimh hau phun zong an si lo ti cu careltu nih nan hngalh cia a si ko lai.

Chim len zong ah Kawlram minung vialte cunglei upa le tuanvo ngeitu dihlak telh in mipi nih zeibantuk biachim zongah mah lungthawh lo le mah ruahnak locun zeiti tikhawh phun kan si lo zia cu kan hngalh cio mi kha asi ko caah mah kong hi cu kan chim ti lo ah a tha rua lai. Biakilh ah lenglei ummi nih FQ a ummi pawl nan kan hmuhning le kan sining cu kan chim cang caah nan hngalh cang lai ka zumh.

Tlunkalnak ah cheukhat cu 20,0000, 35,0000 tiin tangka tampi dih in a tlungkal mi kan si. Tangka a hlei in kan dih, thim hlei ding kan ngeihlo caah a si. Si thiam sehlaw tlunkal hi kan duhmi a si ve lo, a si thiam lo ruangah a tlungkal mi kan si ti kha aho fial lo, ku-za-le phun in nan theihthiam nak hnga ka hun tial.

Biadang pi hun peh ning law, nihin thla 12, zinglei suimilam 11:15 hrawng ah positive an hmuhnak kan umnak hmun cu swab an kan lak I kan dihlak in Negative kan si. Bawipa a tha, kan I lawm cio. Nan kan lawmhpi cio lai dah!

Leave a Reply

Your email address will not be published. Required fields are marked *